Vagalume e Mueve tu vida, premios AJE aos Xove empresario e emprendedor no 2014

Vagalume e Mueve tu vida, premios AJE aos Xove empresario e emprendedor no 2014

A Asociación de Jóvenes Empresarios de Pontevedra outorgou as distincións da XIX edición do seu Premio Xove Empresario do Ano e Premio Xove Emprendedor ás empresas Vagalume, unha consultora enerxética integral enfocada na eficiencia enerxética e as enerxías renovables, e á entidade Mueve Tu Vida que puxo en marcha unha aplicación móbil para promover o benestar e o deporte para persoas que sofren patoloxías como a diabete.

A empresa consignataria situada no Porto de Marín, Pérez Torres, obtivo o premio honorífico e os accésits á creación de emprego e á innovación foron para ASC Construcións e para Monet Tecnología e Innovación, que se centra no traballo en viñedos.

Vagalume, gañadora do Premio Xove Empresario, recibe un iPad e un curso formativo valorado en 8.000 euros, financiado pola Escola de Negocios Afundación. Impúxose aos outros seis aspirantes: Lagasca Vintage, Centro de Día Anduriña, Asc Pontevedra Construcciones e Contratas, Fisiosaúde Sanxenxo, Soutullo&Asociadas e Medianorte Locutores Profesionales. Pola súa banda, Mueve a túa Vida, gañadora do Premio Xove emprendedor, obtén outro programa de formación para Dirección e Xestión de Empresas, ademais dun ano de permanencia gratuíta nun viveiro de empresas do Consorcio da Zona Franca de Vigo.

O vicepresidente da Xunta de Galicia, Alfonso Rueda, foi o encargado de entregar o premio honorífico ao empresario Pedro Pérez Torres e animou ás novas xeracións de empresarios a traballar con esforzo para avanzar nos seus proxectos.

A presidenta de AJE Pontevedra, Lucía Pedroso, foi a encargada de presentar o acto ao que non puido asistir a ministra Ana Pastor por problemas de axenda, pero que si contou coa presenza do seu marido, o presidente da Autoridade Portuaria de Marín, José Benito Suárez Costa; a delegada da Zona Franca, Teresa Pedrosa; o presidente da Confederación Galega de Empresarios, José Manuel Fernández Alvariño, a deputada Ana Isabel Vázquez e o alcalde de Pontevedra, Miguel Anxo Fernández Lores.

Fuente: Pontevedra viva



0